ЯПОНЫ “ЗҮРХ ХАМГААЛАХ ТӨСӨЛ” ТББ-ЫН ЭМЧ НАР ГОВЬ-АЛТАЙ АЙМАГТ АЖИЛЛАЖ БАЙНА

Японы “Зүрх хамгаалах төсөл” ТББ-ын хүүхдийн зүрх судасны нарийн мэргэжлийн эмч нар Говь-Алтай аймагт хоёр өдөр ажиллаж байна. Тэд өнөөдөр зүрхний төрлийн гажигтай хүүхдүүдэд үзлэг оношилгоогоо хийж байна. 
Тус ТББ нь 2001 оноос эхлэн манай улсад зүрхний төрлийн гажигтай хүүхдүүдэд үнэ төлбөргүй үзлэг хийж байгаа бөгөөд Говь-Алтай аймагт анх 2009 онд хүрэлцэн ирж байсан бол өдгөө 10 шахам жилийн дараа ийнхүү үнэ төлбөргүйгээр үзлэг, оношлогоо хийж байгаа юм.
Энэ удаагийн үзлэг оношилгоонд зүрхний төрөлхийн гажиг болон зүрхний өвчтэй хүүхдүүд, энэ төрлийн мэс засалд орж хяналтад байгаа, зүрх судасны ямар нэгэн өвчний онош тодруулах гэх мэт нийт 76 хүүхдийг урьдчилан бүртгэсэн ба өнөөдөр 70-аад хүүхдийг үзэж, зөвлөмж зөвлөгөөгөө хүргээд байгаа гэнэ. Үзлэг оношилгоогоо хийж дууссаны дараа яаралтай мэс засалд орох шаардлагатай хүүхдүүдийг Улаанбаатар хотод Эх хүүхдийн эрүүл мэндийн үндэсний төвд мэс ажилбар хийж байгаа ТББ-ын бусад эмч нараараа эмчлүүлэх гэнэ. 
Энэхүү сайн дурын үйл ажиллагааг Алтайчуудын хүндлэлийг хүлээсэн ахмад эмч н.Базаррагчаа, Д.Гомбосүрэн нарын үр хүүхдүүд санхүүгийн дэмжлэг үзүүлжээ.
 
Э.Нарангэрэл
Мэдээ таалагдсан бол лайк дарна уу