МАН-ынхан гэр бүлийн хүчирхийллийг гэмт хэрэг биш гэж үзлээ

-Монгол ардын нам төрийн эрхийг авсныхаа маргаашаас л улс төрийн өнгийг өөрсдийнхөөрөө зурж эхэлсэн. Дөнгөж өчигдөрхөн л гэхэд, Ж.Эрдэнэбатын толгойлсон Засгийн газар ард түмнийхээ эсрэг кноп дарж, гэр бүлийн хүчирхийллийг гэмт хэрэг биш гэж үзэв. Үүнээс харахад тэдний гаргаж байгаа улс төрийн томоохон шийдвэрүүд үнэхээр ард түмнийхээ төлөө юу, эсвэл хэн нэгний эрх ашгийн төлөө байна уу гэдэг нь эргэлзээтэй-
Ардчилсан намынхан төр барьж байх өнгөрсөн дөрвөн жилийн хугацаандаа Гэр бүлийн хүчирхийлэлтэй тэмцэх тухай хуулийг шинэчилж, УИХ-аар батлан гаргасан нь хууль, эрх зүйн орчинд хийсэн томоохон шинэчлэлийн нэг байв. Олон нийт ч эрх баригчдыг хаалганы цаана өрнөдөг гэр бүлийн хүчирхийллийг гэмт хэрэг гэж үзсэнд нь, бүр хууль эрх зүйн орчинг нь хүртэл чангалж өгсөнд талархаж байсан нь саяхан. Учир нь, маргаашаас хэрэгжиж эхлэх байсан Гэр бүлийн хүчирхийлэлтэй тэмцэх тухай хууль одоо хүчин төгөлдөр хэрэгжүүлж байгаа хуулиасаа хэд давсан, нэг үгээр хэлбэл хаяхаасаа илүү авах зүйл их байлаа. Товчхондоо гэр бүлийн хүчирхийлэл зөвхөн эхнэр, нөхрийн дундах маргаан төдий биш эрүүгийн гэмт хэрэг байхаар зүйлчилж өгсөн байв. 

Өөрөөр хэлбэл, гэр бүлийн хүчирхийлэл үйлдэж, хэн нэгний амийг санаатайгаар хөнөөсөн, биед нь гэмтэл учруулсан зэргээс нь хамаарч ял оноохоос гадна шалтгаан нөхцөлөөс нь үүдэж оноох ялыг нь хүндрүүлэх, багасгах гээд уян хатан байхаар тусгасан байв. Үүнээс гадна дээрх хуульд шинэчлэлийг хийснээр гэр бүлийн хүчирхийлэл анх удаа гэмт хэрэгт тооцогдох эрх зүйн орчин үүсч байсан төдийгүй хүчирхийлэл үйлдсэн хүн хохирогчид дөхөж очихыг тодорхой хугацаагаар хориглох, зан үйлд нөлөөлөх албан сургалтад хамруулах зэрэг хорихоос өөр төрлийн ял, албадлагын арга хэмжээг хүлээлгэх, хүүхдэд үйлдсэн хүчирхийллийг бүх хүн мэдээллэх үүрэгтэй байхаар тусгаж өгсөн. Хохирогчийг хамгаалах зорилгоор долоон төрлийн үйлчилгээг албан ёсоор хуульд тусгаж өгсөн бөгөөд хохирогчийн эрх, хууль ёсны ашиг сонирхлыг шүүхийн шатанд хамгаалах үүргийг прокурор гүйцэтгэнэ гэх зэрэг олон давуу талтай байлаа. Харамсалтай нь, Ерөнхий сайд Ж.Эрдэнэбатын толгойлсон Засгийн газар ард түмнийхээ эсрэг кноп дарлаа. Тэд гэр бүлийн хүчирхийллийг гэмт хэрэг биш гэж үзэв. Эрх баригчдын иргэдийнхээ эсрэг кноп дарсан шалтгаан нь ердөө л өмнөх парламентын гишүүдийн алдаа, дутагдлаас улбаатай гэнэ. Учир нь, тэд хуулиа баталж, дагаж мөрдөх хугацааг нь товлосон хэдий ч ёсчлон батлаагүй төдийгүй төрийн эмхэтгэлд хэвлүүлэлгүй орхижээ. Энэ нь одоогийн гишүүдэд бөөн шалтаг болж орхив бололтой. 

Өөр нэг шалтгаан нь, 12 жилийн дараа шинэчлэн өнгөрсөн хавар батласан энэхүү хууль нь одоо чуулганаар хэлэлцээд буй Эрүүгийн хууль, Зөрчлийн хууль болон Эрүүгийн хэрэг хянан шийдвэрлэх тухай хууль, Хууль сахиулах ажиллагааны тухай хууль, Шүүхийн шийдвэр гүйцэтгэх тухай хуультай нягт уялдаатайгаар хуульчлагдсан явдал юм. Олон нийт ч ганц Гэр бүлийн хүчирхийлэлтэй тэмцэх тухай хууль биш дээрх хууль, эрх зүйн орчны шинэчлэлийг хүлээж байсан гэхэд болно. 

Хэдийгээр парламентын зарим гишүүн эл хуулийг хэрэгжүүлээд явах нь зүйтэй гэдгийг хэлж байгаа ч төрийн эрхийг атгасан улс төрийн нам олонхиороо хүч түрсэн нь ард иргэдэд хүндхэн цохилт болов. Үнэндээ МАН төрийн эрхийг авсныхаа маргаашаас л улс төрийн өнгийг өөрсдийнхөө зурж эхэлсэн. Улс төрийн өнгийг тэд зурах явцдаа буюу дөнгөж өчигдөрхөн Ж.Эрдэнэбатын Засгийн газар ард түмнийхээ эсрэг кноп дарж, гэр бүлийн хүчирхийллийг гэмт хэрэг биш гэж үзэснээс Үүнээс харахад тэдний гаргаж байгаа томоохон улс төрийн шийдвэрүүд үнэхээр ард түмнийхээ төлөө юу, эсвэл хэн нэгний эрх ашгийн төлөө байна уу гэдэгт олон нийт эргэлзэж эхлээд байна. Өөрөөр хэлбэл маргаашаас хэрэгжиж эхлэх байсан Гэр бүлийн хүчирхийлэлтэй тэмцэх тухай хуулийг өчигдөр буцааж татсанд нь бухимдаж байна. 



Эх сурвалж:Өглөө.сонин
Мэдээ таалагдсан бол лайк дарна уу