Эрүүгийн хуулийг дагалдах таван хуулийг буцаалаа

УИХ-ын чуулганы хуралдаанаар Эрүүгийн хэрэг хянан шийдвэрлэх тухай хууль, Хууль сахиулах ажиллагааны тухай хууль, Шүүхийн шийдвэр гүйцэтгэх тухай хууль, Гэр бүлийн хүчирхийлэлтэй тэмцэх тухай хууль зэрэг таван хуулийг буцаах тухай асуудлыг хэлэлцэж баталлаа.

Хуралдааны үеэр Төрийн эмхэтгэлд хэвлэн нийтлэгдээгүй, ёсчлон батлагдаагүй тул дээрх таван хуулийг буцааж байна хэмээн Хууль зүйн байнгын хорооны дарга тайлбарлалаа. Мөн Гэр бүлийн хүчирхийлэлтэй тэмцэх тухай хуулийн хэрэгжих хугацааг наашлуулж өгөхийг гишүүдийн зүгээс хүсч байсан юм.

Ингээд хэлэлцэж буй асуудалтай холбогдуулж гишүүдийн илэрхийлсэн байр суурийг  хүргэж байна. УИХ-ын гишүүн Л.Болд:

-Гэр бүлийн хүчирхийлэлтэй тэмцэх тухай хуулийн хэрэгжих хугацааг наашлуулах хэрэгтэй. Одоо байгаа УИХ-ын эмэгтэй гишүүд энэ асуудал дээр ажиллах хэрэгтэй.

УИХ-ын гишүүн Д.Лүндээжанцан:

-Уншиж сонсоогүй гэж хуулийн хэрэгжих хугацааг хойшлуулдаг жишиг олон улсад байгаа юу?

УИХ-ын гишүүн Ш.Раднаасэд:

–Бусад улсад албан ёсоор гарын үсэг зурж, ёсчилж баталснаар хүчин төгөлдөр болдог юм байна лээ.

УИХ-ын гишүүн Ц.Цогзолмаа:

-Энэ парламентад сууж байгаа эмэгтэй гишүүд гэр бүлийн хүчирхийллийн асуудлыг ойлгож байна. Гэхдээ Эрүүгийн хуульд өөрчлөлт оруулах нөхцөл байдал үүсээд байгаа тул хойшлуулахыг дэмжих байгаа юм. Энэ хуулийн хугацааг наашлуулах боломж байна уу?

УИХ-ын гишүүн Ш.Раднаасэд:

-Заавал долдугаар сарын 1 гэхгүй. Гэр бүлийн хүчирхийллийг наашлуулах асуудлаар ажлын хэсэг ажиллана.

УИХ-ын гишүүн З.Нарантуяа:

-Цагаан дээр хараар бичсэн хуулийг буруу тайлбарлаж болохгүй. УИХ-ын чуулганаар эцсийн хэлэлцүүлэг хийгээд батлагдчихсан хуулийг хүчин төгөлдөр бус төсөл төдий зүйл гэж ярьж болохгүй гэв.

Ийнхүү буцаан татсан хуулийн төсөл дээр ажлын хэсэг байгуулан ажиллаж, Гэр бүлийн хүчирхийлэлтэй тэмцэх тухай хуулийг яаралтай өргөн барихаар боллоо.

Чуулганы хуралдаан үргэлжилж байна. .Хөдлөх эд хөрөнгө болон эдийн бус хөрөнгийн барьцааны тухай хуульд өөрчлөлт оруулах тухай хуулийн төсөл ийг хэлэлцэх эсэхийг хэлэлцэж байна.

Мэдээ таалагдсан бол лайк дарна уу